ورہے دناں دا دن 
رضی الدین رضی دی پنجابی لکھت


” کگُو کوڑے( گھگو گھوڑے ) بچیاں دے کھڈونے‘‘ ۔۔۔اج دے بچیاں نے تے اے لمی ہیک والی واج نئیں سنی ہونڑی ، پر اسی اپنڑے بچپن ءچ مائیاں دیاں اے واجاں سنڑیاں سن ۔ کگُو کوڑے اج وی فٹ پاتھاں تے وکدے نظرآندے نے ۔ ملتان ءچ خاص طورتے جدوں اسی ہنرمنداں دی گل کرنی ہووے یا شہر دی ثقافت دا ذکرہووے تے کگُو کوڑیاں دا ذکر ضرور ہوندا اے۔ اے تے خیرایویں گلاں چوں گل نکل آئی، اصل ءچ تے مینوں اپنڑی نکے ہوندیاں دی عید یادآرئی سی۔جدوں میں اپنڑے دادے ہوراں تے چاچے ہوراں نال عید پڑھن جانداسی۔نویں‌ کپڑے ، ہتھ ءچ مصلا تے ساڈا رخ چھونڑی دی اوس عید گاہ ول ہوندا سی جیڑی ریڈیو پاکستان دے سامنڑے ہن عالی شان مسیت دے طور تے موجوداے۔ تے اوس مسیت ءچ ہن عام دناں چ اکوفرقے دے جنازے پڑھن دی اجازت اے۔
ساڈا بچپن دا زمانہ 1970تے اودے بعد دا اے۔ اناں دناں چ ایتھے اک کھلا مدان ہوندا سی۔ اوس مدان ءچ اک محراب سی جتھے امام صاب نے خطبہ دینڑا ہوندا سی۔ اے مدان پاکستان بننڑ توں پہلے دسہرا گراﺅنڈ کواندا سی۔پاکستان بنڑیا تے دسہرےدا میلہ وی ختم ہوگیا۔فیر ایتھے عید نماز شروع ہوگئی۔مسیتاں دے امام وی اوس زمانے ءچ پیشہ ور نئیں ہوندے سن اوناں دی روزی روٹی داحیلہ کوئی ہور ہوندا سی ۔ عید نماز حکیم ارتضی حسین اجملی پڑھاندے سن ۔حکیم صاحب دا کینٹ دی اوس گلی ءچ مطب سی جیڑی ہن چوڑی بزار کواندی اے۔ حکیم صاب تے ہن حیات نئیں پراو مطب ہن وی چل ریا اے۔حکیم صاب دا چھوٹا جیا بیان ہوندا سی ۔او بڑی ہولی ہولی گل کردے سن۔ انداز ایسا ہونداسی کہ اوناں دی گل سنن نوں وی دل کردا سی۔ مولویاں دیاں چانگڑاں دا دور بعد ءچ آیا ۔
حکیم ارتضی صاب عام دناں ءچ نماز نئیں پڑھاندے سن صرف عیداں دیاں نمازاں پڑھان آندے سن۔ ویلہ لنگدا گیا ۔جناں نال میں عید پڑھن جاندا سی او اک اک کر کے ٹرگئے تے اودے نال ای اوریتاں وی مک گیاں جیڑیاں چھوٹی عید نال جڑیاں ہویا ں سن۔عید نماز دے بعد غبارے، گھگو گھوڑے، لکڑ دیاں پھرکیاں، گتے دیاں ڈگڈیاں تے کسیٹن والی ٹرٹرلے کے جدوں اسی گھراں نوں آندے تے سارے رستے شورہوندا سی۔ کانیاں ،گتیاں، تاگیاں تے ربڑاں نال بنڑے ہوئے اے کھڈونے اج وی تہواراں تے ملدے نے، پر بچیاں نوں ہن موبائل دے لوڈ تے گیماں دی ضرورت اے۔
عیدی سانوں پنج یا دس روپے ملدی سی جیڑی اسی امی ہوراں‌ دے حوالے کردیندے سی۔دوپہر دے بعد اسی لال کرتی جاناہوندا سی۔ جتھے ہن شربتاں والے بیٹھے نے اوتھے اک گراﺅنڈ ہونداسی جیڑا ہنڑ پارکنگ ءچ بدل گیا اے۔ تے سامنڑے جتھے سبزی والے بیٹھے نے اوس جگہ تے پنگوڑے لگدے سن۔اسی ایناں پنگوڑیاں تے چُوٹے لیندے سی ،اوتھے ای پٹھاناں نے غبارے دے نشانے لان والے بورڈ رکھے ہوندے سن جیڑے ہن ختم ہوگئے۔اسی چھرے آلی بندوق نال پگانے دا نشانہ لئی دا سی۔ کول ای ٹاکی والا سینما(بائی سکوپ) ہونداسی جدے نال اکھ لا کے اسی مکے مدینے دی سیر کردے سی تے دنیا جہان دیاں عماراتاں ویکھدے سی۔نویں‌کپڑے اوس زمانے صرف عید تے ملدے سی ،جوتیاں دا جوڑا وی عید تے خریدیا جاندا سی ۔ عید کارڈاں دے ڈھیر گھراں اچ آندےسن عید کاروبار نئیں‌ورہے دناں دا دن ہوندا سی ۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے